Lluosyddion economaidd dangosol (tablau mewnbwn-allbwn)
Disgwylir y diweddariad nesaf:Ebrill 2026
Diweddariadau
- 15fed Hydref 2025
- Set ddata a gyhoeddwyd gyntaf.
Prif wybodaeth
- Dynodiad
- Ystadegau swyddogol yn cael eu datblygu
- Darparwr data 1
- Llywodraeth Cymru
- Ffynhonnell y data 1
- Tablau cyflenwad a defnydd a thablau mewnbwn-allbwn
- Darparwr data 2
- Y Swyddfa Ystadegau Gwladol (y SYG)
- Ffynhonnell y data 2
- Arolwg Cyflogaeth y Gofrestr Fusnes (BRES)
- Darparwr data 3
- Y Swyddfa Ystadegau Gwladol (y SYG)
- Ffynhonnell y data 3
- Arolwg o'r Llafurlu (LFS)
- Darparwr data 4
- Llywodraeth Cymru
- Ffynhonnell y data 4
- Arolwg Amaethyddol Mis Mehefin
- Cyfnod amser dan sylw
- Ionawr 2019 i Rhagfyr 2019
Trosolwg
- Crynodeb o’r set ddata a newidynnau
Mae'r set ddata hon yn cynnwys lluosyddion ac effeithiau cynnyrch economaidd, Gwerth Ychwanegol Gros (GVA), a chyflogaeth i gyd-fynd â'r tablau mewnbwn-allbwn ar gyfer Cymru.
Gellir defnyddio lluosyddion ac effeithiau i amcangyfrif effeithiau uniongyrchol ac anuniongyrchol newid i allbwn diwydiant gan ddefnyddio ystod o fesuriadau economaidd (ac aneconomaidd).
Mae'r set ddata hon yn cynnwys lluosyddion Math I a Math II ar gyfer cynnyrch economaidd, GVA a chyflogaeth. Mae'r ddau fath yn mesur effeithiau uniongyrchol ac anuniongyrchol, tra bod lluosyddion Math II hefyd yn cymryd i ystyriaeth yr effeithiau a ysgogwyd gan newid i incwm cyflogaeth. Mae esboniad pellach o’r cysyniadau hyn ar gael yn yr erthygl ystadegol ategol.
Efallai y bydd y ffigurau cynnyrch economaidd, GVA a chyflogaeth a gyflwynir yn y tabl o ddefnydd i ddefnyddwyr sydd â diddordeb mewn deillio matrics Leontief eu hunain. Mae'r ffigyrau cyflogaeth yn arbennig o bwysig, gan na ellir deillio’r ffigurau rhain o'r tabl mewnbwn-allbwn ar ei ben ei hun. Ni ellir chwaith amcangyfrif cyfanswm y gweithlu cyflogedig ar gyfer y sectorau mewnbwn-allbwn yn uniongyrchol o ffynonellau data sydd wedi eu cyhoeddi gan y Swyddfa Ystadegau Gwladol na Llywodraeth Cymru.
- Cyfrifo neu gasglu data
Mae'r lluosyddion a'r effeithiau a gyflwynir yn y set ddata hon yn deillio o'r tablau mewnbwn-allbwn ar gyfer Cymru. Mae methodoleg amlinellol sy'n disgrifio sut y lluniwyd y tablau ar gael ar wefan Llywodraeth Cymru.
Mae'r dull o gynhyrchu lluosyddion ac effeithiau cynnyrch economaidd, GVA, a chyflogaeth yn dilyn yn fras y dull a amlinellir yn Miller and Blair (2019) (Gwasg Prifysgol Caergrawnt).
Un manylyn pwysig yn y fethodoleg Math II yw’r ffordd y caiff cyfernodau gwariant aelwydydd eu cyfrifo. Yn hytrach na rhannu gwariant treuliant aelwydydd â chyfanswm y golofn, rydym yn ei rannu â chyfanswm incwm aelwydydd o bob ffynhonnell. Yn 2019, £77,606 miliwn oedd yr enwadur a ddefnyddiwyd, sef swm adnoddau cynradd ac eilradd o gyhoeddiad Incwm Aelwydydd Gros i’w Wario y Swyddfa Ystadegau Gwladol.
Mae hyn yn gyson â'r dull a ddefnyddir gan Lywodraeth yr Alban.
Mae'r dull hwn yn adlewyrchu'r ffaith nad yw holl dreuliant aelwydydd yn cael ei ariannu gan incwm a enillwyd. Mae cyfran sylweddol yn cael ei ariannu trwy incwm na enillwyd, megis pensiynau, difidendau, a throsglwyddiadau eraill. Byddai cynnwys y ffynonellau hyn yn y ddolen adborth yn chwyddo effaith incwm a enillwyd mewn modd artiffisial wrth ysgogi rhagor o wariant gan aelwydydd.
Dim ond ar gyfer dadansoddiadau mewnbwn-allbwn y dylid defnyddio'r amcangyfrifon cyflogaeth cyfwerth ag amser llawn (FTE) a gyflwynir yn y set ddata hon. Mae amcangyfrifon o nifer y gweithwyr cyflogedig yn deillio o Arolwg Cyflogaeth y Gofrestr Fusnes (BRES). Ategir y rhain gan ddata NOMIS ar hunangyflogaeth a swyddi Lluoedd EF yng Nghymru. Cymerir amcangyfrifon cyflogaeth ym maes amaeth yn uniongyrchol o Arolwg Amaethyddol a Garddwriaethol Llywodraeth Cymru. Defnyddir pwysyn syml o 0.5 ar gyfer gweithwyr rhan-amser i ddeillio amcangyfrifon cyfwerth ag amser llawn.
Ceir rhagor o wybodaeth am y fethodoleg yn yr erthygl ystadegol ategol.
- Ansawdd ystadegol
Mae dadansoddiadau mewnbwn-allbwn gan ddefnyddio lluosyddion yn enghraifft o fodelu ecwilibriwm rhannol. Ni chaiff newidiadau i strwythur yr economi ar yr ochr gyflenwi eu modelu. Mae gan hyn nifer o oblygiadau pwysig y dylid eu hystyried wrth ddehongli’r data.
Mae’n bwysig nodi y bydd y lluosyddion a gyflwynir yma yn tueddu i or-ddweud yr effeithiau anuniongyrchol, ond ni fydd maint y gor-ddweud yn hysbys. Mae dadansoddi gan ddefnyddio lluosyddion a’r tablau mewnbwn-allbwn yn gweithio orau pan fo maint yr effeithiau'n gymharol fach o’i gymharu â maint y diwydiannau perthnasol (a’u gweithluoedd) ar yr ochr gyflenwi.
Gellir dod o hyd i ragor o wybodaeth am ansawdd y data, methodoleg, a chyngor ar ddefnydd priodol o’r data yn yr erthygl ystadegol ategol. Anogir yn gryf i ddefnyddwyr adolygu’r ddogfen hon cyn gwneud unrhyw ddadansoddiadau gan ddefnyddio'r data.
Mae'r lluosyddion a'r effeithiau wedi eu seilio ar y tablau mewnbwn-allbwn ar gyfer Cymru. Fel ystadegau swyddogol o dan ddatblygiad, mae rhai agweddau o’r broses o greu’r tablau lle mae'r data yn llai cadarn. Caiff y cyfyngiadau hyn eu hamlygu yn y fethodoleg amlinellol sydd wedi’i chyhoeddi ar wefan Llywodraeth Cymru.
Cyhoeddwyd gan
- Sefydliad
- Llywodraeth Cymru
- E-bost cysylltu
- tablaumewnbwnallbwn@llyw.cymru